أول مرة اكتب بالعربى , ماعتقدش إن ده تغيير فى الشخصية, بس هتابع الموضوع لحسن تكون دى القطرة اللى فى أول الغيث, و يلاقونى فى أعماق المرض النفسى بعد كده.
يوم السبت هو يومى المفضل. طول العشرين سنة اللى فاتوا كان دايما بيحصل فيه حاجة كويسة.
زمان, كانت ماما بتاخدنى نتمشى يوم السبت الصبح, و كنت بجيب الكتب
الصغيرة دى بتاعة ما وراء الطبيعة و ملف المستقبل.(للأمانة أنا لسة بجيب ما وراء الطبيعة لحد دلوقتى).
و فى المدرسة كان هو اليوم اللى بعده الأحد, يوم الأجازة, فكان ممكن انى بعد الظهر أعمل حاجة غير المذاكرة. و ساعات كنت بقعد فى المدرسة لحد الساعة 5,كنا بنعمل زى نشاط كده, تحت اشراف المدرسة طبعا.
و لما اشتغلت, كان يوم السبت جميل لأنه بقى أجازة عند ناس كتير تانيين,فالشوارع بتبقى فاضية, و الطريق سهل و بياخد 25 دقيقة بدل ساعة و نص.
و كمان كان يوم استقبال الوحدة اللى اشتغلت فيها فترة فى سنة الامتياز. كان يوم مرهق... بس جميل, لأننا كنا عارفين بنعمل ايه, و كنا بنتحرك حركة مفيدة و مثمرة, بعيد عن العشوائية و (المهوبصة) اللى كانت بتحصل. و أهم حاجة كنا مع ناس طيبين و محترمين.
الحقيقة الفترة دى كانت حلوة كل اليام مش بس السبت.
و لمل اشتغلت فى المدرسة الأحد كان أجازة, بس كنت بعمل شهادة التربوى, فكنت بروح المهندسين يوم الأحد.
بس السبت كان بردة يوم جميل, لأنه بعد الجمعة, يوم نبطشيتى فى مركز الحياة. كان يوم عظيم لأنه مفيهوش مستشفى و لا أسعاااااف.
و لأنى بردة مع ناس بحترمهم و بحبهم.
السنة دى مفيش "الحياة" و مفيش تربوى. يمكن الجدول زحمة شوية, بس بردة جدول السبت جميل.
أناكتبت الكلام دة من فترة علشان منساش قد ايه ربنا كريم معايا..... بس قلت اشاركه معاكم انهاردة......... السبت.
No comments:
Post a Comment